Life for Rent

我本來好好興致想睇下書寫下o野，點知忽然變左自我檢查。
我諗我變左好多，o係不知不覺間，我好似唔再係我認識o個個自己。

最明顯莫過於，我開始習慣於現實，開始我容忍力前所未有地提高，對於周遭o既各種事，我本來理應頂唔順，但我仍然繼續咁過。我想問如果我無左道火，我仲點能夠接受自己繼續生活？實在太多事，例如工作，例如人。
工都未返，雖然係開過會，但我已經開始問，點解當個個去做緊達到自己理想o既o野o既時候，點解我要去教書？我唯有同自己講，我一路都後知後覺開架啦，兜個圈轉個彎，去體驗下生活o既質地，我會更加知道自己要點行，呢d 時間，我都仲o徙得起o者。我都唔知呢ｄ說話，我係安慰緊自己，定放縱緊自己，放縱緊自己唔去努力，放棄緊自己o既夢，俾自己成為我一向藐開o個種人。我希望我唔會咁。我俾一年時間自己，唔鍾意o既我就走，如果到時我都仲係猶疑不決，唔該摑死我。
我開始要自己相信似乎唔可能發生o既o野，例如堅持相信一個根本唔可能改變o既人，同自己講忍下忍下就一世架啦，我怕我未忍到一世我已經頂唔順死左，未來o既o野邊個知道，點解唔俾自己後悔然後另覓更好，未來o既o野邊個知道，可能我o既容忍會得到最後，做乜o野，我不嬲唔係sell開包容架。
我人生目標係瀟灑，我想我自己能夠義無反顧做自己覺得應該做o既o野，做抑或唔做，都應該瀟灑決斷，咁先對得住作為人o既生命力。唔係好似依家咁，係定唔係，連自己都唔知，食哂屎咁。
其實o係依家呢個咁動蕩多變o既環境，我懷疑如果有人扶一扶我，我就以身相許架啦。
我檢視呢一段時間o既我，其實係唔會去諗，我辦事能力有冇好到、我有冇多左朋友、我係咪仲咁大頭蝦等等等等，可以見得我個人，真係唔係幾實際，我要求自己同要求人地，不嬲都唔係幾實際。但我唔覺得係咩問題o者。